Тог тасрав \02.09.2008 орой\

Тог гэнэт тасрав. 

Ширээ тойрон хоолож суусан бид бүгд цочин уулга алдацгаав. 

Солонго сандарсандаа аавынхаа гарнаас зууран авч "Хоо хоо" хэмээн ихэд гайхсан өнгөөр дуугарна. 

Мааяа харанхуйд илүү сайн харчих санаатай 2 бүлтгэр нүдээ улам бүлтийлгэн над руу ширтэнэ. \Хөөрхөн шүү миний охид.\ 

Хоол идэхийн өмнө Мааяагийн шавдуулан байж асаалгасан 2 лаа аминд орж, тас харанхуйд нүдээ анивчин суух аюулаас биднийг аврав. Удалгүй бүгд харанхуйд дасаад лааны бүдэгхэн гэрэлд инээлдэн хооллох нь нэг их сайхан ч юм шиг санагдаад ирэв. Хэн ч тог тасарлаа гэж гомдоллосонгүйгээс харахад бүх хүнд энэ гэнэтийн өөрчлөлт таатай санагдаж байгаа нь илт.

Солонго Мааяа 2 яаран босч нэг нэг гар чийдэн асаан хана таазан дээр тусах гэрлийг нь харан баясаж инээлдэн гүйлдэж эхлэв. 

Нөхөр бид 2 сүүмийсэн гэрэлний 2 талд суун энэхэн тэрхэнийг ярилцан суухад үнээр таатай. 

Гэнэт "дингил дингил дингэл дин". Надад мээссэж ирлээ. Ах маань дөнгөж сая охинтой болоод гэр лүүгээ буцаж байна гэнэ. Тог тасрахад ийм сайхан байсныг би ер санахгүй юм. 

Бүх зүйл үнэхээр сайхан байна. 

Үгүй гэжүү?